Personvernerklæring

Her står det kva opplysningar Ukelogg lagrar om deg, kvifor, kven som kan sjå dei, kor lenge dei blir lagra, og kva du kan gjere.

Sist oppdatert 8. november 2026 · Les på bokmål

Kort fortalt

• Andre elevar ser aldri loggane dine.
• Loggar du inn med Feide, og skuleeigaren din har teke i bruk lærartilgang, ser kontaktlæraren og YFF-læraren din vekene dine utan at du treng å gjere noko. Andre lærarar har ikkje tilgang.
• Utan lærartilgang, og når du bruker brukarnamn og kode, er det berre du som ser loggane dine.
• Vil du vise loggen til andre, bestemmer du det sjølv: du lastar ned ei fil eller lagar ei lenkje som kan lesast i eitt år.
• Vi bruker ikkje reklame, sporing eller analyseverktøy, og vi sel aldri opplysningane dine. Korte oppsummeringar med KI er av til du sjølv slår dei på.
• Opplysningane blir lagra på ein server i Finland, innanfor EU/EØS.
• Du kan når som helst laste ned alt du har skrive.

Kven er ansvarleg

Ukelogg blir laga og drifta av SamfunnPrep (Samfunnprep Suslov, org.nr. 937 473 273).

Når skulen din bruker Ukelogg

Når du loggar inn med Feide frå ein skule som har teke Ukelogg i bruk, er skuleeigaren (kommunen eller fylkeskommunen) behandlingsansvarleg. SamfunnPrep er då databehandlar og behandlar opplysningane berre etter instruksane frå skuleeigaren, slik det står i databehandlaravtalen mellom oss. Det er også skuleeigaren som bestemmer om lærarar skal ha tilgang til loggane. Har du spørsmål om korleis skulen bruker opplysningane, kan du også kontakte skulen eller personvernombodet til skuleeigaren.

Når du bruker Ukelogg på eiga hand

Bruker du Ukelogg utan ein avtale med skulen, til dømes med brukarnamn og kode, er SamfunnPrep behandlingsansvarleg.

Innlogging med brukarnamn og kode er ei mellombels løysing, og ho blir erstatta av Feide. Då kan du flytte loggane, vedlegga og lenkjene dine til Feide-kontoen din med «Har du brukt Ukelogg før?». Vi seier frå i god tid før noko skjer med kontoar som ikkje er flytta.

Kva vi lagrar

Er du lærar, lagrar vi opplysningane frå Feide og kva veker du har opna. Det blir ikkje laga loggar for lærarar.

Ukelogg lagrar ikkje IP-adresser. For å stoppe misbruk, til dømes gjetting av kodar, held serveren ein hash av IP-adressa i minnet i høgst éin time. Ved tryggingshendingar, til dømes ei mislukka innlogging, kan den same hashen stå i serverloggen. Hashen viser ikkje sjølve adressa.

Skriv ikkje meir om helse eller andre sensitive forhold enn det som trengst. Er ei veke utan praksis fordi du er sjuk, held det å velje «sjuk».

Kvifor, og rettsleg grunnlag

Vi bruker opplysningane berre til å la deg føre, lagre, laste ned og dele loggane dine, til å la læraren din følgje opp praksisen når skuleeigaren har bestemt det, og til å halde tenesta sikker og i drift. Vi bruker dei ikkje til reklame, profilering eller automatiserte avgjerder.

• Gjennom skulen: Skuleeigaren bestemmer grunnlaget, også for lærartilgangen. Vanlegvis er det at behandlinga er nødvendig for å utføre ei oppgåve i allmenta si interesse, nemleg opplæringa (personvernforordninga artikkel 6 nr. 1 bokstav e, med opplæringslova).
• På eiga hand: Behandlinga er nødvendig for å levere tenesta du har bede om (artikkel 6 nr. 1 bokstav b).

Kven kan sjå opplysningane

• Du. Du ser alltid dine eigne loggar når du er logga inn. Andre elevar har ikkje tilgang.
• Læraren din, viss skuleeigaren har teke i bruk lærartilgang. Les meir under Lærartilgang.
• Dei du deler med. Alle som har ei lenkje du har laga, kan lese det lenkja viser utan å logge inn, i eitt år eller til du slettar ho. Gi lenkja berre til dei som skal sjå loggen. Lagar du ein PDF av ei veke med andre vedlegg enn bilete, inneheld han ei slik lenkje til filene. Slettar du lenkja, sluttar filene å verke også i PDF-ar som allereie er lasta ned.
• SamfunnPrep. Den som driftar serveren, har teknisk tilgang. Vi ser ikkje på innhaldet ditt, med mindre du ber om hjelp, det trengst for å rette ein feil eller sikre tenesta, eller lova krev det.
• Hetzner (Hetzner Online GmbH, Tyskland). Hetzner leiger oss serveren tenesta køyrer på. Hetzner er underleverandør og får ikkje bruke opplysningane til eigne formål.
• Feide (Sikt). Når du loggar inn med Feide, er det Feide som sjekkar kven du er, og som fortel oss kva rolle og kva grupper du har. Feide får vite at du loggar inn i Ukelogg, men ikkje kva du skriv. Les meir i personvernerklæringa til Feide.
• OpenAI, berre viss du slår på oppsummering med KI. Då blir det du har skrive i loggane, sendt til OpenAI i USA, så kvar veke får éi kort setning i logghistorikken. Namnet ditt, praksisplassen, kontaktopplysningar og vedlegg blir ikkje sende. Ifølgje OpenAI blir teksten ikkje brukt til å trene modellar, og han blir normalt sletta etter høgst 30 dagar. Er funksjonen av, blir ingenting sendt. Loggar du inn gjennom skulen, finst funksjonen berre viss skuleeigaren har godkjent OpenAI som underleverandør.

Bortsett frå Hetzner og oppsummeringane over bruker vi ingen underleverandørar som får tilgang til opplysningane dine, og berre oppsummeringane blir overførte til land utanfor EU/EØS.

Lærartilgang

Lærartilgang gjeld berre når du loggar inn med Feide frå ein skule der skuleeigaren har lagt han inn i databehandlaravtalen med oss. Læraren må også logge inn med Feide. Det er Feide som avgjer kven som er lærar, og kven som går i klassen.

• Kven. Læraren i basisgruppa di (kontaktlæraren) og læraren i YFF-gruppa di. Andre faglærarar har ikkje tilgang.
• Når. Du treng ikkje å trykkje på noko. Læraren ser tekst og vedlegg når alle dei obligatoriske spørsmåla er svarte på, eller når veka er over (søndag kl. 23.59) og noko er skrive. Før det ser læraren berre at veka er påbyrja. Er veka merkt utan praksis, ser læraren årsaka.
• Spørsmåla. Læraren kan bestemme spørsmåla for klassen og om elevane kan endre dei. Det endrar aldri det du alt har skrive, og læraren kan aldri endre svara dine. Spørsmål du legg til sjølv, er ein del av loggen.
• Endringar. Det du endrar seinare, blir vist for læraren med ein gong. Du kan ikkje skjule ei veke for læraren, men du kan slette ho.
• Kor lenge. Læraren ser berre veker i perioden gruppa gjeld for. Nytt skuleår gir ny gruppe, så førre lærar mistar tilgangen, og ny lærar ser ikkje fjoråret. Veker frå før lærartilgangen vart teken i bruk, blir ikkje viste. Blir læraren teken ut av gruppa i Feide, stoppar tilgangen seinast etter 12 timar.
• Innsyn. Under «Di side» ser du kva klassar som har tilgang.

Kvar opplysningane blir lagra

Alt blir lagra på éin server i Helsinki i Finland, som SamfunnPrep leiger av Hetzner og driftar sjølv. Kvar dag blir det teke ein tryggingskopi av databasen på den same serveren. PDF-ar blir også laga på denne serveren.

Informasjonskapslar og lagring på eininga

Ukelogg bruker to informasjonskapslar, og begge er nødvendige for at tenesta skal verke. Den eine held deg innlogga. Den andre vernar innlogginga med Feide og finst berre i høgst 10 minutt medan du loggar inn. Vi bruker ingen informasjonskapslar til sporing, statistikk eller reklame.

I tillegg lagrar appen dette i nettlesaren på eininga di:

• tekst du har skrive, men som ikkje er send til serveren enno, til dømes dersom nettet er borte
• namnet ditt, så appen kan visast før han har kontakt med serveren
• om du har valt lys eller mørk modus, og kva målform du bruker
• sjølve appen (ikkje loggane dine), så han kan opnast utan nett

Når du loggar ut, blir namnet ditt fjerna frå eininga. Tekst som ikkje er send enno, blir liggande til du loggar inn igjen og han blir send. Bruker du ein delt PC, bør du vente til appen viser at alt er lagra, og så logge ut.

Kor lenge vi lagrar

• Loggar og vedlegg: til du slettar dei, eller til kontoen blir sletta.
• Vedlegg som aldri vart lagra i ein logg: blir sletta automatisk etter 3 dagar.
• Rolle og klassar: så lenge kontoen finst, så loggane viser rett klasse.
• Kva veker lærarar har opna: så lenge skuleeigaren har bestemt i databehandlaravtalen.
• Innloggingsøkter: for elevar går dei ut etter 30 dagar utan bruk, og seinast etter 90 dagar. For lærarar går dei ut etter 12 timar.
• Delte lenkjer: i eitt år, eller til du slettar dei eller veka dei viser.
• Oppsummeringar med KI: til du slår funksjonen av eller slettar veka.
• Tryggingskopiar: dei 30 siste dagane. Det du slettar, er derfor heilt borte etter høgst 30 dagar.
• Gjennom skulen: skuleeigaren bestemmer kor lenge kontoar skal lagrast, til dømes at dei blir sletta etter at du er ferdig med skulen. Vi følgjer det som står i databehandlaravtalen.

Tryggleik

• All trafikk går kryptert over HTTPS.
• Kodar og innloggingsøkter blir berre lagra som hashar. Databasen og filene kan berre lesast av tenesta sjølv på serveren.
• Kvar fil du lastar opp, blir sjekka, og berre du, læraren din med lærartilgang og dei du deler ei lenkje med, kan hente ho.
• Lærartilgang blir sjekka på serveren for kvar veke og kvar fil, og han byggjer berre på det Feide oppgir.
• Delte lenkjer er lange og tilfeldige, blir ikkje viste i søkjemotorar, og IP-adresser som gjettar feil for mange gonger, blir stoppa.
• Ved eit brot på personvernet varslar vi skuleeigaren utan ugrunna opphald. Er SamfunnPrep behandlingsansvarleg, varslar vi Datatilsynet og deg når lova krev det.

Rettane dine

Du har rett til å:

• sjå kva opplysningar vi har om deg. Under «Di side» kan du laste ned alt du har skrive som ZIP eller JSON.
• rette opplysningar som er feil. Loggane kan du endre sjølv. Opplysningar som kjem frå Feide, blir retta hos skulen.
• slette opplysningar. Loggar, vedlegg og lenkjer slettar du sjølv. Vil du slette heile kontoen, skriv du til post@ukelogg.no.
• få med deg opplysningane dine (dataportabilitet) ved å laste dei ned.
• protestere mot eller be om avgrensa behandling.
• klage til Datatilsynet dersom du meiner vi behandlar opplysningane dine i strid med regelverket.

Bruker du Ukelogg gjennom skulen, går førespurnader om innsyn og sletting til skuleeigaren. Sender du dei til oss, hjelper vi skuleeigaren med å svare. Vi svarer innan ein månad.

Kontakt

Har du spørsmål om Ukelogg eller personvern, eller vil du bruke rettane dine, skriv du til post@ukelogg.no.

Juridisk ansvarleg for prosjektet

Prosjektleiing

Endrar vi denne erklæringa, oppdaterer vi datoen øvst. Store endringar seier vi frå om i appen.